Mit Meditation zum perfektä Chakra

Zur Mitternachtszyt isch äs starchs Gwitter uber Tenero zogä. Idr mitti vudr Wuchä simmer z’erst mal mit Müsig gweckt wordä, wiä alli Jahr wieder mitem Liäd „Guten Morgen Sonnenschein“. Nachem Üfwachä simmer as Zmorgä ys go stärchä fir z’Training idr Hallä. Zur Abwächslig hemmer einisch äs Königsvölk gspielt statt iizlaifä. Aschliessend hemmer i 2 Gruppä Doppeltaktik agluägt. Diä „Chlinerä“ hend Grundsachä durägnu und bidä „Gresserä“ sind d Känntnis üfgfrischt wordä. Dernah isch ysers Lagerturniär witergfriährt wordä. Ä chlinä Theorie- & Praxisblock hets vorem z’Mittag nu churz gäh. Zum z’Mittag hets Ris mit Gmiäs gäh und nah dr churzä Mittagspaisä het d Olympiadä gstartet. Mit 10 verschiedenä Pöstä hemmer dr Namitag verbrungä. Egal ob chli, gross, Badminton, Handball, Schwinger oder Nationalturner, jedä isch uf sini eignig Art & Wis üfgnu wordä idä durmischletä Gruppenä. Ä chlini Abchiälig hemmer wäred dä Olympiadä mit Rägä verdiänt. Bevor miär as verdiäntä Grilliärä sind hemmer nu ä Rundi Werwölflä gspielt. Bim Grilliärä het mä d Corona Situation ai gmerkt, d Leiter hend bim Ässä üsägäh messä Maskenä aha. Nachem Feinä ässä hemmer nu Schätzfragä messä lesä fir d Olympiadä. Zum Abschluss hets äs Mentaltraining, gfiährt vudr Aline und Abira, gäh und nu ächle Beach Volleyball gspielt.