Strängä Start

Hit simmer scho am 6:15 gweckt wordä und sind direkt gah footä. Nacher hemmer ä Gump i See derfä machä. Hungrig simmer as z’Morgä und hend ihs gsättigt. Diä Wuchä defet miär ä anderi Hallä kännälernä, doch leider memmer immer 15min. zu dä Hallä laifä (Anm.d.Red.: die Ärmsten). Idä Hallä hemmer alli Grundschleg repetiärt und aschliässend hemmer äs aspruchvolls Kraftraining vum James gmacht. Mit Chickennuggets und Härdepfel hemmer ihs gstercht fürs Bogäschiässä und für de sträng 3km-Laif. Denn isch ä Rundi chillä agseit gsi. Mit Hunger simmer wider as z’Nacht gangä und hend ihs gfreiwt, wills Kebab gäh het. Nah hets gheissä, miär gend numal id Hallä und hend verschidnigi Artä vu Spil uf de Fälder gmacht. Am Schluss hemmer d Ehr gha, dr Wurzelmaa z suächä. Nid nur wägem Training hemmer hit gschwitzt, sondern ai wills so heiss gsi isch…