Tag 6 (Dr Bonussprung iz Wasser)
Olivia, Alessandro 26. Juli 2019 Allgemein , Tenero 2019
Hittä am Morgä simmer zum letschtä Mal mitem Üfwachliäd gweckt wordä und hend iis firs Footing parat gmacht. Obwohl miär chli miäd gsi sind hemmer das alli guät uberstandä und de Sprung i See isch richtig erfrischend gsi. Bevors denn as Zmorgä gangä isch hemmer nu miässä i iseri Zält ga Koffer packä. S Zmorgä isch we immer sehr fein gsi und hit hets als krönändä Abschluss sogar Nutella gä. Mit isernä Partybüssli hemmer iis denn grad nachhär ufä wäg id Hallä gmacht firs letschtä Träning. Det hemmer Zit becho um die letschtä Spiel vo iserem Turnier z spilä. Als Priis hets fir jedä vo iis ä cooli niwi Trinkfläschä und anderi Gschänkli gä. Hungrig vo dene strängä Matches simmer ga Zmittag ässä. Nachem Zmittag hemmer letschti Üfrümarbeitä miässä machä. Wo de alles blitz und blank gsi isch, hets ai nu ä Rangverkündigung vom mittwuchnamittags Spielturnier gäh. Ä chli speter hemmer iis denn scho ufä Heiwäg gmacht. Miär hend diä Lagerwuchä sehr gnossä und sind chli trürig dass es so schnell verbii gangä isch. Miär freiwät iis ai wider sehr uf Daheimä und natirlich ai ufs nechstä Jahr.
